法國式工作

CarmenNg

本欄在四月十日講「法國追求增長」，一位讀者Wong來電郵，附上英國「衞報」一篇報道（四月九日），題目係"When the French clock off at6pm, they really mean it"，讀者Wong話內容與左丁山嘅論調有矛盾喎。「衞報」（據英國通陶傑所言）係英國「左派」報紙，屬於反市場，要求福利一類，贊成法國縮短工時，一啲都唔奇。據呢篇「衞報」報導，法國自1999年訂下每週工作三十五小時法案之後，因電子科技不斷發展，智能手機、電郵等進一步入侵私人生活空間，不少法國僱員放工返家後，仲會收到公司電郵文件或被要求上網睇公司客戶情況，在家吃過晚飯，還是要工作，於是法國工會與僱主聯合談判達成協議，法國工人放工後，不得受「威脅」，冇義務要閱讀、收集與工作有關嘅文件、訊息。IT界與顧問服務界每每最多呢啲「晚飯後午夜工作」，但上述有法律效力嘅協議落實後，所有IT界、顧問界嘅二十五萬僱員亦都受到保護。

如果我係法國僱員，係「既得利益」人士，已有一份工作職位，梗係大聲叫好啦。法國勞工市場嘅最大特點係搵工難，炒魷絕不容易，有一份長工者，可以印印腳享受福利。法國人不喜歡「過份勤力」工作，並非今日始，張總未退休之前，在巴黎嘅銀行總部工作，收到DHL送到香港分行急件，要求總部盡速回覆，以免香港客戶焦急不安。但當時已係巴黎時間下午三時，張總要下屬緊急處理，下屬回以一句：「三點咯噃……」其他部門職員已開始準備下午小休，跟住預備放工咯。

當年法國仲係興旺，中國市場仍然冬眠，法國人懶懶閒，唔死得人。但到咗21世紀，法國國力相對上大不如前，2013年12月份有330萬人失業，失業率係11.1%，失業率在2013年上升咗5.7個百分點，年青人失業率更高，2014年1月高達23.6%，已比一年前下降咗2.5個百分點。咁多人失業，工會話俾佢地聽每週工作不得超過35小時，晚上唔使睇黑莓，年青人點會笑得出。我地在威靈頓街擺花街一帶，聽到越來越多法文對話，不少法國人移居香港，尋找工作及新生活，INYT在3月22日，報導6,300萬法國人之中，有160萬居於國外，比2000年高出六成，最多人（35萬）搬去倫敦，追求創業之夢，因為佢地覺得人在法國嘅話，全無上進機會，到倫敦可勤力工作，追求夢想。






左丁山