印度電影:可憐天下父母心2017

erict

　　睇見起跑線，不禁動筆寫兩句。貫穿整套戲就係由因果而恨開始。

　　今日社會，有心人捉正豐裕社會中上層人士心態，先用恐懼為先鋒，玩一套啖啖肉但其實係棉花糖嘅遊戲，再教埋你子女點樣interview，亦可以將呢套手法反過來用，同樣收到效果，恰恰就係中國千幾年前老千方法（因為在公開平台，唔講呢套手法個名，以免有人知道一二而害人）。陰謀論講一句，個補習學校教你點樣喺回答interview時嘅問題，果一套model answer就係交底，就係密碼，要嚟打籠通。

　　遷入貧民區扮窮人爭學位，喺香港正正有此情況。若非主角良心發現，一定過到骨。

　　再睇到公立學校冇錢冇人冇社會及地方政府支持，但學生們不怨天尤人，竭力打好基礎。公立學校學生去德里學校表現完時，拍掌果一幕非常震撼。原來，掌聲來自你個牌頭，恰恰就是因為你著套靚靚老西去中環飲茶，待仔都招呼好D，這等心態，先敬羅衣後敬人，完全唔係因為你有內涵而稱讚，這就是現實世界，而家都仲有。

　　最令人心酸就係貧民區幫主角爭取學位果個大哥，因為主角冇錢交雜費，扮撞車搏懵幫佢籌旗，搞到周身傷而不問付出幫男主角。真係仗義每多屠狗輩。

　　但最令我感到震撼就係德里學校個校長。校長出身家貧，以前受盡有錢同學白眼，日日要幫同學做功課至有機會去玩。大個咗身在高位，忘記晒以前嘅苦頭，今日，反而用以前的怨恨對待社會，而忘記晒當日自己曾經因為社會比個機會佢上位。回顧今日社會上頭面人物，當日又何嘗唔係好似呢個校長咁？今日回顧從前，點解變晒？權力呢個兩個字確實係鴉片，令你有名又有利，日日追求，比性更興奮。追逐權力永無止境，個重點係你時常會有患得患失之感，今日好似有權力，聽日唔知點。為保權力又令自己名利雙收，可能因為咁，一而再，再而三，驅使你做盡壞事。反而女主角因為最後明白，即使得來的學位係不當，最後亦不會有好結果，懂得放手，不再為難男主角放棄德里學位，竟然天空海闊，想通了，就放手。

　　千祈唔好錯過呢套咁正嘅起跑線，非常寫實而正正在香港今時今日發生。