壓制言論

yinkk

有錢大晒，壓制言論自由方法，唔止係動輒與傳媒打官司，用本傷人，令傳媒飽受壓力，還有抽廣告、撤贊助，一於截斷媒體水源，令傳媒快啲乾塘。例子多得很，「蘋果日報」係最佳例子，近年報紙銷量整體下跌，當然係事實，但據知「蘋果日報」銷路還有十幾萬份，跑馬日有馬經版帶動銷量增加三四萬份，在本港仍然係暢銷報紙，遠勝一啲權威消息報，但廣告頁數呢，左丁山都唔敢去數咯。為乜蘋果銷路相對地好，廣告相對地低，原因一字咁淺。中環啲老闆如在蘋果落廣告，隨時會收到電話。如要找證人，當然一個都冇，邊個會同錢銀生意作對喎，中國市場之大，係香港人難以想像嘅，一間電器零售連鎖店（蘇寧），就可以用二億七千萬歐元買下國際米蘭嘅七成股份，香港百老匯可以得咩？Lancôme係法國化裝品護膚品大集團，屬歐萊雅（L'Oreal集團），旗下名牌眾多，每年有大量宣傳廣告費，足以用銀紙摙死傳媒，但俾張環球時報一罵，就擒擒青取消與何韻詩嘅音樂會，變相壓制何韻詩平時之政治言論自由，背後當然係驚死失去內地市場，大集團大唔過經濟強國，為生意着想，要向更有錢嘅地方朝拜。
除咗錢之外，言論自由亦受軍事獨裁、政治強人壓制，睇吓埃及、泰國、土耳其便可知一二。在民主國家，過份政治正確亦抑制言論自由，是故特朗普鍾意講乜就講乜，反而成為美國基層人民偶像。美國有好多過份自由派分子，雄踞大學，阻止保守派學者升職，鼓吹「人有不被冒犯的權利」（a right not to be offended），少數人的權利，修正過往歷史、文化歧視，搞到教授學者不敢暢所欲言，少數族裔學生反而有更大發言權，連邀請前國務卿賴斯到大學演講，都可能係冒犯學生嘅行為。當然，最赤裸裸壓制言論自由嘅係中國、俄羅斯與北韓。上期經濟學人嘅封面故事就係用把鎖穿住個嘴，美國言論自由受政治正確及有錢佬打官司威脅，一啲國家嘅言論自由受政府領導人威脅，香港言論自由就受「抽廣告」威脅，長此以往，恐怕香港傳媒全部都會變成唱好喉舌，口徑被統一了。



左丁山