老波骨跣腳

yinkk

建制派又有一員大將「特事特辦」，鬧出笑話，隨時會俾競選對手在今年9月競選時大力圍攻。呢位大爺係大佬級噃，點會犯下咁低級錯誤，涉嫌運用特權㗎。
醫生C以前在公立醫院做過，亦曾在私家醫院當駐院門診醫生幾年，先至出來掛牌，呢日吃午飯時對左丁山講，在公立醫院識得醫生，打尖話咁易，有邊個未曾替親戚相熟朋友攞過一號籌㗎？不過咁，佢地一定要在公眾地方輪候，萬萬不能在職員通道出入或職員休息室等候，否則就會穿煲，易招批評及投訴。好似譚耀宗咁張揚入伊利沙伯醫院做小手術，你估奉旨嘅咩，要打尖都要靜雞雞吖嘛。
相信雙料元老議員譚耀宗及佢嘅老友──一位伊利沙伯醫院副顧問醫生都想低調，不張揚嘅，但衰在出入用職員通道及職員休息室，加上有人吩咐下屬唔好將件事講出去，就犯咗大忌。醫院內一來會有黃絲帶醫護人員知道，二來較年輕職員時興在fb爆料，好多大公司都有如此情況，醫生做咗一啲類似「濫用特權」事件，紙就一定包不住火，兩下就在網絡廣傳，讓傳媒接棒追查。
社會平時有好多同類「拍膊頭」事件，無人理會，大眾視若等閒，為何偏偏建制派出事，就痛批痛罵？是否公平？係唔公平㗎嘞，政治人物必須知道，社會可以容忍平民利用關係打尖，詐作不知，但對政壇人士，就另有一把尺去衡量，而且特別嚴苛；此外，今天香港行政長官民望特低，講得唔好聽，係惹人討厭人物，大凡與佢有關係嘅，都俾市民反對，例如大慈善家李東海之公子李君豪，在證券界有頭有面，由政府委任做中大校董，夠晒資格，可惜委任佢嘅特首係梁振英，佢與梁振英有良好關係，咁就因人廢言，俾一啲中大校友反對進入中大校董會，呢樣嘢係純粹對人不對事，對李君豪唔公道，但今時今日嘅香港，就係咁嘅咯，已經因梁特首政治而撕裂，敵人的朋友就是我的敵人，有理冇理鬧兩句先，何須問情由！正因如此，以譚耀宗咁老波骨，居然為耳仔瘜肉小手術犯上利用特權之惡名，給反對派提供彈藥，你話幾唔抵吖！如果佢有政治智慧，搵相熟私家醫生在私家醫院割除瘜肉，乾淨利落，花費不多，駛乜落得俾醫管局調查事件，連累有關醫務人員，中聯辦睇見梁振英將小事化成危機，譚耀宗將芝麻綠豆小事變成政敵把柄，一定係嬲到唔識出聲。



左丁山