真係高招

erict

　　聽過Dr講一人兩票，投工聯會。向來對呢班友無好感，特別係果個「日以繼夜，夜以繼日」格仔衫加孭背囊的形象，非常難頂，係過期柏林仔低B版。

　　但回頭一想，更用了認識的東西思考，高招！絕對係人人開心，又樂觀其成的上策。

（一）破壞式建設
　　曾經聽過肥佬黎當年講，大約係點樣辦蘋果日報，用的就是破壞式管理。先否定過去霧氣沉沉的酸腐文人辦報作風，把一眾請來的文人趕去做社論，起用一大班朝氣蓬勃又有衝勁的精英管理，徹底改變舊日幾多條及格仔式設計，天天劃新版。因為，肥佬黎相信，要用既定版位辦報，可能同電話簿無分別。今天，不管是香港還是台灣，左中右立場的報紙，都徹頭徹尾抄蘋果日報藍本。唔破舊，何來立新？

（二）互動思維
　　在某個時間及空間，更要是在固定份額的場所，不論是選舉，市場，做生意或賽馬，都差不多。以賽馬為例，上季季尾，蘇偉賢馬房喜得福四十倍爆冷贏馬，似乎早已暗示今天第六場同是蘇偉賢馬房的飛星凱旋十六倍爆冷贏馬。兩者似沒有關係，其實並不是。因為，這兩匹馬曾在澳洲同場出賽，喜得福跑第五，飛星凱旋跑第二。蘇偉賢心思慎密又有料，上季派喜得福爆冷成功，他對飛星凱旋在三班1200米經常接近更有信心，落四班跑豈不是猛虎出柙？
　　想帶出的是，當佈局之人派出四五流人物出戰，已有小成，早已有信心可以收割成果。但只有集中火力於勝算最高又有所謂意外驚喜的成果，再利用例如紙牌屋曾提及用search engine擾亂選民視線（特別係現時所謂什麼風火雷電動計劃，玩意向投票，單純在統計學上已違反一切數學基礎論據，因為用口講跟有行動，絕對係兩回事），盡收現實及網上世界之效。既然今年二月出咗個喜得福有六萬幾票，今天，飛星凱旋是否如魚得水？

　　有時，做事不能要求最好，大多數情況是選取比較不太爛的就上。既然所謂民主派什麼派二三十年來都係搞笑，有些更天天嗌口號，而竟然跟敵軍主將的名字都叫不上口，係咪好好笑？即係話你可能在十多年來都買錯馬，睇錯報紙，不如今天就揀個無咁爛嘅蘋果。

　　如果集中火力投注飛星凱旋，可能盡收大洗牌兼鬼打鬼之利。既然人生都不過是一場夢，不如明天發個破合縱，斷連橫之夢。

　　我響應郭博士建議，自有選舉權以來，第一次投工聯會。