電力何去何從: 「智能」電錶爆炸

CarmenNg

澳門靠內地輸電　風險高　污染勁
【前車可鑑】
同為特區的澳門過去十年由自主供電走到全面依靠大陸，澳電高級經理葉錦榮（圖）表示，澳門2004年僅輸入7.1%電力，但去年已升至92.1%。他指國家優先供電政策下，供澳電力質量仍有待改善，過去兩、三個月發生兩次供電不穩。但自2006年起，澳門向內地的購電價格已上升三成六。他建議港人清楚考慮內地輸電利弊。
葉指澳門特區早已訂下政策全面依靠內地供電，他坦言靠外地輸電風險較高，污染問題較嚴重，因為輸澳電力煤電佔七成，未來煤電比例未見下降趨勢。據了解雙方供電合約未明文保證供電穩定性，及一旦停電的賠償問題，僅優先照顧澳門供電。他指自2006年起澳門向內地的購電價格已上升三成六，電價要靠澳門政府爭取；近日聯網設計亦發現有問題，內地正修改輸配電設備。澳電為居安思危，正籌建一個新天然氣機組，但未來只能提供不足五成的後備電力。
對於本港應否輸入電力，他未有正面評論，但就提醒港人應仔細閱讀相關報告和資料才決定，「你哋有得揀，但㩒咗go掣冇得返轉頭」。但環境局昨日堅拒透露聯網方案的研究報告。
《蘋果》記者

CarmenNg

「智能」電錶爆炸

原來加州幾日前因一部貨車意外撞毀一條馬路輸電杆，就導致幾百戶嘅「智能」電錶爆炸，住戶內插座被焚黑，電器損毀。香港睇怕都無傳媒敢報啦。

聽聞中電就快要全部人換「智能」電錶喇呵？祝香港人好運！

http://www.takebackyourpower.net/news/2015/04/01/hundreds-of-smart-meters-simultaneously-explode/

CarmenNg

開放電力市場所為何事？ 文:  徐家健

考考大家，以下幾段關於香港電力市場的論述，是出自何經何典？

(一)香港的電力市場，建基於傳統獨佔市場的架構，一向為消費者帶來卓越可靠和可負擔的電力供應。這是相當大的成就。

(二)相比之下，研究顯示，透過競爭模式規管，尤其是零售層面，會出現市場混亂或甚至不良後果。

(三)有專家建議，為了追求一個未經證實、不肯定成效的模式而廢除現有的模式，是不智的決定。

答案不是中電，亦非港燈。消委會最近聯同國際消費者聯會成立了一個專家小組，為的是檢視各主要市場電力規管改革的經驗以及對消費者的不同影響。以上幾段論述，便是節錄於上星期四消委會為此發表的《香港電力市場研究報告》。

與大家從各大傳媒看到聽到的有點不同，消委會是肯定「現行用來規管電力市場的管制計劃協議，在多方面都能完善地為香港提供可靠及可負擔的電力」的。既然在現行規管制度下兩電一直為消費者提供可靠及可負擔的電力，廢除現有模式又可能導致市場混亂或甚至不良後果。在「If it ain’t broke, don’t fix it」的原則下，開放電力市場所為何事？

請教過專家小組和消委會朋友，再細讀百多紙報告後，我衷心感謝消委會和幾位專家的努力。報告抵讚之處是如實承認現行規管制度的優點和指出外地開放電力市場帶來的種種問題。所謂「能源三困」(energy trilemma)追求的平、靚、正，現行制度做到至少超過一半。卓越可靠的「正」，香港電力市場全球數一數二。可負擔的「平」，香港亦比東京和新加坡等地便宜得多。

消委會認為要改善的「平」，是制度的「不公平」，即嫌兩電賺錢太多，而對劏房住戶和能源貧窮家庭的保障卻是太少。至於可持續發展的「靚」，報告指「現行規管架構彈性不足，不能配合新的環保政策，包括隨後30年減少排放廢氣的課題。」

劏房住戶和能源貧窮家庭的問題，我要問解決貧窮問題成效較高的是兩電、政府、還是其他慈善團體？要知道，兩電連劏房住戶的基本聯絡資料也是沒有的。更何況，正如消委會在報告提到：「根據海外經驗， 開放零售電力市場只會令更多的利益向商業用戶傾斜，而非住宅用戶。」最重要的環保問題，下次再談。

作者為克林信大學經濟系副教授/香港科技大學經濟系客座副教授

CarmenNg

縱容電霸撳住搶 利潤管制太荒唐

(太陽報) )大家一定記得，前幾年因為油價高企，民間發起「餓死油魔」慢駛抗議行動，好多職業司機響應o架。不過香港又點止油魔橫行咁簡單吖，電霸飛擒大咬、張牙舞爪先至最難頂。消委會建議屋苑及大廈自行發電，實行餓死電霸咁話，有冇得諗呢？

嗱，電力公司年年賺大錢，年年勁加價，早就怨聲載道喇，特別係中電，早前先至放風明年電費加幅逾一成一，嚇到市民O晒嘴。雖然最近轉口風，指增加輸港核電比例後，電費加幅有望下調，但點都好，電費一定加硬嘅喇，爭在加多定加少咋。

面對電霸貪得無厭，消委會最近發表香港電力市場研究報告，批評利潤管制協議容許兩電賺盡百分之九點九九嘅准許利潤，並將燃料價格波動全數轉嫁消費者，對消費者完全唔公平。消委會提出十招應對，除咗開放電力市場，仲破天荒建議當局容許大型屋苑、醫院或大學引入小規模天然氣發電機自行發電，實行自給自足，減低對兩電嘅依賴。消委會仲話，現時唔少大廈已有後備發電機組，主要使用柴油，如果改用天然氣，就可以更加環保嘞。

消委會嘅建議無疑係出於好心，不過講就容易咯，實際上係另一回事。一來後備發電機組係咪足以穩定供電，令人懷疑；二來使用天然氣必須鋪設管道，工程浩大，埋單計數，未必划算o架。經濟學都有講喇，小型生產嘅成本，點都高過大規模生產嘅，所以話，消委會嘅建議可行性不足，盞嘥氣嘅啫。

咁講啦，自行發電雖然難以付諸實行，但消委會出此下策，確實反映出市民對電霸予取予求嘅無奈。講到底，港府成隻紙老虎咁，對兩電監管如同虛設，任由電霸做獨市生意賺到盡，先至係問題癥結所在。正如消委會話齋，要標本兼治，辦法只有一個，就係立法強制兩電開放電網，引入競爭，有競爭咯喎，電費自然有下調空間喇。

冇錯嘞，香港係資本主義社會，有乜理由容許電霸千秋萬代壟斷市場喎。講起就激氣喇，電霸之所以橫行無忌，全拜前朝貪曾政府明益兩電所賜，簡直累人累物吖。無論點都好，現屆政府有責任撥亂反正，趁即將檢討電力市場發展，唔該港產官僚生生性性，做番場好戲，唔好再任由電霸撳住搶喇，叮！

samuellui

不用猜, 一定同大陸買, 國情需要..........無計!

CarmenNg

議員倡學新加坡增天然氣儲備   

■會計界立法會議員梁繼昌建議本港仿傚新加坡，在國際市場採購天然氣。  

【本報訊】政府提出聯網發電方案激起港人對能源自主憂慮，有能源學者指港府早在2008年將能源自主交予中央是錯誤決定，時任特首曾蔭權突然與國家能源局簽訂《能源諒解備忘錄》，決定未來20年西氣東輸天然氣，每單位天然氣高達18至20美元，是全世界最貴。會計界立法會議員梁繼昌建議仿效新加坡，增加本港能源儲備，從各地採購液化天然氣。
08年與中央簽約棄自主

綠色和平資深項目主任古偉牧指，90年代香港已從崖城輸入天然氣，其時佔本港發電能源比例低。2008年中電提出興建逾百億造價的液化天然氣站，但港府與內地簽約，決定未來20年供港核電和天然氣有增無減，迫使中電擱置計劃。他指當時政府突然簽約，各界對此「走漏眼」，若今日提出有關計劃定必引起巨大爭議。

梁繼昌支持本地發電方案，他提議天然氣供應多元化，不單依賴西氣東輸。他指目前在國際天然氣市場，美國開採頁岩天然氣每單位僅4美元，遠較西氣東輸便宜。新加坡除了四條從馬來西亞和印尼的離岸天然氣管道，亦有興建液化天然氣站，容量逐步增至900萬噸。

城市大學能源與環境政策研究中心總監鍾兆偉表示，《備忘錄》令供氣來源單一，氣價亦屬世界最貴水平。他建議港府仿效「戰略油庫」般儲備天然氣。但他估計，外國液化天然氣輸抵本港每單位價格達14美元。

古偉牧引用台灣經濟部能源局數據，進口液化天然氣每單位價格12至15美元，只較西氣東輸略為便宜，他指《備忘錄》至少確保穩定氣源，若再興建新天然氣接收站，基建造價或逾200億元，最終經濟效益未必大。

CarmenNg

政治拉入生意   

國情專家L對左丁山講買電政治大勢，佢話習李上台後，推出一連串打貪腐事件，以周永康為首嘅石油幫頭目紛紛下馬，由中石油集團董事長蔣潔敏以至中石油之分區管理層都受到調查，能源局亦有類似情況，昔日之「電力女皇」李鵬千金李小琳已突轉低調，出席公開場合，不再珠光寶氣，反而在三月份人大，「素顏示人」。記唔記得幾年前李小琳曾傳出與中華電力前總經理潘國濂合作，聲稱可賣電來港，曾經製造一時轟動，但好快就煙消雲散。

以專家L嘅觀察，中國電力系統之管理權力已由李派轉移到習派手上，整個石油能源系統亦會由習派掌控，待塵埃落定後，石油、能源、電力各部門會有新政策。

中石油集團在特區政府政策幫忙下，已與中電簽訂二十年天然氣供應合同，中電不能擺脫，南方電網亦已買入青山發電廠約三成股權（美資EXXON賣出），國家電網趁電能分拆香港電燈投資（2638）上市，買入18%股權成為基礎投資者，可見一早已有伏線，今次黃錦星等官員不斷宣揚向內地買電之好處，自有配合之意。

還有一段不太為本港報章注意嘅新聞，就係新創建出售澳門電力之實益股權畀南光，交易完成後，國務院企業南光實際上完全控制澳門電力。今天澳門如此，他日港燈中電難道不會「君體也相同」嗎？黃錦星話過向澳門學習嘅噃。

專家L講話，點到即止，其餘叫左丁山去靠估。以中共之本性，崇尚控制，英文所謂control freak，戰略性企業如電力、電訊、電台、電視等等，總喜歡由自己人或可影響或可信任之舊人把持，未必信得過之新人（如王維基）想攞牌，難之又難。

當政府出甚麼諮詢文件，叫市民選擇方案一或方案二，還未有結果之時，主其事者已不理會任何常識理據，數據及後果，猛咁宣揚方案一嘅時候，究竟是為了甚麼？黃錦星局長係建築師，智力點會低B吖，如果冇政治原因，好難令人相信。在任何地區做生意，不理政治不成，生意越大，政治越會自動走上門，當政府與企業之決策不是完全建基於經濟計算，而係要下下計及政治因素，其競爭力唔跌，幾稀耳！  


左丁山

CarmenNg

深圳停電   

研究中國多年，不時到大陸研究國情嘅專家L，呢日去大學演講完畢，出席晚飯飯局，對左丁山講：「你在專欄講向內地買電，有反對之意，我睇完你寫嘅理據之後，發覺你冇乜講到買電嘅政治性質，有啲偏差噃！」

講內地政治，左丁山當然唔係專家L嗰皮，但根據數字，以事論事，將來如向內地買電（佔香港三成用電量），供應嘅可靠性的確令人憂慮，譬如中電在五月二十一日向環境局提交意見書，就指南方電網去年每名客戶嘅停電時間達138分鐘，而中電每名客戶嘅意外停電時間係平均2.3分鐘，相差60倍，香港用電客戶點能夠唔重視供電可靠性？東鐵今年因本身之電纜出事或其他意外而導致停駛起碼兩次，俾市民鬧到暈，如果中電停供電力138分鐘嘅話，後果不堪想像。

香港這兩個月來，有過黑雨，不時有黃雨、暴雨、雷暴警告，港人已習以為常，但到目前為止，香港停過電未？答案係零次。

一個星期有三日在深圳工作嘅工廠老闆F要搵左丁山飲下午茶傾偈，講到電力供應，佢就吐苦水，引述內地傳媒報導講，5月11日，因有雷暴及強降雨，影響所及，深圳電網220千伏麗騰甲乙線N7塔塔腳發生嚴重塌方、深圳電網有77條次10千伏線路停電，截至5月12日，廣東電網500伏線路跳閘3條，220千伏線路跳閘4條……停電分區2410個，客戶24.8萬戶，主要集中在深圳、東莞、江門、陽江、中山、珠海與河源，深圳受災較為嚴重。講得咁詳細，左丁山問佢喺邊度睇到，數字從何處來？老闆F打電話返深圳叫夥計再查，哦，查到嘞，就係5月14號嘅「南方電網報」，南方電網都幾誠實透明，冇隱瞞事實，所以老闆F話：「香港向南方電網買電？叫黃錦星上深圳感受吓停電先啦！」騎騎，身在福中不知福，乃人之常情，到真係停電臨頭之時，大家咪亂作一團，互相指駡，鬧上立法會，要求問責囉！

回頭講番專家L，佢當晚就話左丁山講事實冇鬼用，大勢就係電力係戰略性企業，中央需要逐步控制，供電可靠性與電費、環保不在考慮之列，大前提係中央戰略，特區政府必須遵從，逐步執行！  


左丁山

CarmenNg

一拖廿一 隨時著火 五層塔拖板無王管

[am偵查]本港不時有住戶因電線拖板短路，致單位付諸一炬，令人關注家居用電安全問題。市面近日出現一款5層高直立式「塔型」拖板，四面合計竟共有19個不規則插孔的插座，另備兩個標準USB充電位，設計相當誇張。有工程學者表明，拖板在未插滿電器前，經已超出供電負荷，質疑設計「搵笨」及有潛在火警危險；機電署亦承認，現行法例僅規管拖板插孔樣式，對插座數目則未有限制，凸顯監管政策荒謬。

該款標榜是「專利產品」的5層高直立式拖板，由內地製造，在深水埗鴨寮街及旺角女人街一帶攤檔有售，價格由120元至150元不等，視乎拖板層數而定，最少兩層，最多5層，而每層均有一個獨立開關掣。由於拖板採用直立式「塔型」設計，較傳統平放式拖板慳位；加上每一層的四面都設有插座(最底層其中一面改為兩個USB充電位)，成為該拖板的特別賣點。不過，拖板上的插孔採用圓插與方插混合設計，不符合《電氣產品(安全)規例》中的安全標準規格。

檔販含糊其詞拒證安全
本報記者上周喬裝顧客到鴨寮街實地觀察，發現至少3檔有售該款直立式拖板，並有不少市民圍觀檔販推銷，但檔販刻意插上大批低負荷的手機充電線，試圖營造可承受高負荷的假象，並於短短5分鐘內賣出兩套。期間，記者向檔販提出安全質疑，包括「1拖21」會否超出負荷，以及是否符合本港安全標準等，檔販一概無正面回應，僅含糊其詞稱：「最大(功率)有3,000火，夠㗎喇，跳掣你撳reset就得，有咩問題你拎嚟換啦」，並即時將拖板放入膠袋，連包裝盒及收據亦欠奉。

記者事後將拖板交予理大機械工程學系工程師盧覺強檢查，並以實驗室內的萬用錶，測試拖板插上抽濕機後的通電情況，雖未見漏電，但拖板透出一陣塑膠受熱發出的怪味。期間，盧覺強發現拖板底部近電線部分，多了一顆紅色按鈕，他相信是拖板內置的斷路裝置：「當拖板電力超過負荷嗰陣，佢設計會先跳呢個紅掣(斷電)，你一撳就重新連接(斷開嘅)電路，可以話佢設計係預咗你不停跳掣」。不過，盧覺強指平日難以察覺該斷路裝置會否失靈，強調危急時應切斷供電，惟部分舊樓及劏房電箱無獨立斷路器，或令拖板在超負荷時短路起火。

雪櫃電視加焗爐已爆錶
盧覺強又提到，撇除兩個USB充電位，拖板表面有19個插座，但本身用作取電的「三腳插」只配備一個13安培保險絲，代表滿載時每個插座平均只能「分享」約0.6安培，「你插滿火牛幫電話充電都得嘅，但插多幾件電器就一定唔得」。他以家用電器為例(詳見表)，指出一個雪櫃、一部電視機，以及一個焗爐，已近乎用盡13安培的電流上限，質疑19個插座的設計誇張，並直言設計「搵笨」，「市民買拖板係求方便，有位就插落去，唔會同你慢慢計數……無可能用得晒全部插頭」。

國際專業保險諮詢協會會長羅少雄指，若市民明知產品不安全，但仍堅持購買使用，在發生意外後可被保險公司拒賠，「其實好簡單講常識，平時都有宣傳話要小心超過負荷，你仲買個咁多個插嘅(拖板)」。他又指，單據是索償的必要條件，「冇單想追究個製造商都唔得」。

機電署：無預審產品要求
本報曾登入機電署網站，翻查針對家用電器產品安全規格的網上登記名冊，惟未能找到該款拖板的「符合安全規格證明書」。署方回覆本報查詢時承認，本港未有就拖板「插座」數目設立上限，而現行法例亦無預審家庭電氣產品的要求，但供應商須確保售賣的電氣產品，通過相關的安全測試並已獲發「符合安全規格證明書」。署方強調，會定期巡查並抽檢，但未有提供相關檢控數字。

   

CarmenNg

黃錦星盲推買電   20 May 2014  


左丁山先父成世人只做過一份工，就係在中華電力做咗40年，因此左丁山自幼就對電力事業有少少認識與興趣。

香港九龍新界電力供應之最大優點就係供應能夠緊貼香港民間及工商界需要，要幾多有幾多，從不缺電，左丁山自懂事以來，香港未試過有「電力分配」（power rationing），各區輪流停電，或者因為有風暴、黑雨而出現局部地區性大停電等等在外國遇上嘅事情，我地香港人從來唔擔心冇電用，就好似唔擔心冇空氣可供呼吸一樣。

鄰近珠三角地區就唔同，喺夏季炎熱高峯之際，工廠不時分區輪流停電、配電，供應穩定性差好遠，同香港冇得比。有議員時時反對電費加價，大駡電力公司，但試吓比較，據2013年數字，亞太區城市電費以吉隆坡、台北最平（但台北有政府補貼），中電排第八、澳門排12、新加坡排17，又唔見得中電電費貴得去邊噃。

最近政府推出諮詢文件，拋出方案一，Plan A，即從內地電網輸入更多電力，方案二即Plan B，利用更多天然氣作本地發電。用天然氣發電，可減少排放，左丁山舉腳贊成，俾多啲電費當作環保代價，冇乜好反對，環保從來不是免費午餐，總有成本負擔。向內地電網買電，係唔係（一）可減少本港污染，（二）可穩定或甚至減少本地電費呢？左丁山最近睇好多報導，見到黃錦星局長有自己嘅偏好立場，就係猛推方案一，向內地買電，但完全唔敢講究竟買電後，電費唔會增加，至於污染，佢又係模稜兩可，其實大家已有常識，內地發電不少用煤，用石油，污染度高，每有北風，珠三角嘅懸浮粒子就會自由過境，香港難逃霧霾過境侵襲。還有，穩定性點呀？黃局長一樣講到阿吱阿咗。左丁山笨笨地都要問一句：向內地買電嘅話，電費還是增加、污染還是不減，供應穩定性更會倒退，咁講法儍瓜都唔肯買啦，何解黃局長係要推動向內地買電？佢是否有政治任務？五月七日有一個浸大研討會，現時向內地買入92%電力嘅澳門電力公司代表話向內地買電量越多，議價能力越低，加上輸電網係架空電纜，人為及天氣因素均會影響供電，香港人要多加考慮。黃錦星仲話可以參考澳門買電方法㖭，人家竟然有微言噃，黃局長唔係聽唔到呀嗎？聽到就唔好盲推向內地買電啦！  


左丁山