[眾新聞]_退休警_協調遊行十載見盡百態

newhello

協調遊行十載見盡百態　
退休警嘆：示威係好正常　
最尊重長毛
2021-06-07
[眾新聞]


踏入六七月，本來是傳統遊行集會的季節，可是香港新常態下已是奢談。曾在遊行集會前線與各主辦單位聯絡及協調超過15年的退休警員李Sir（化名）直言，遊行示威是提供渠道表達不滿，「係好正常嘅一樣嘢，唔係洪水猛獸」。


李Sir說，自己與不同團體如民陣、支聯會都有好的合作關係，講求的是互相尊重，並點名支聯會是愛國組織，一直尊重警方及協助維持秩序。他慨嘆，2019年反修例運動爆發後，中央收緊對香港政策，一國先於兩制，「支聯會運作能否繼續？我就唔係太樂觀喇」。



2019年七一遊行，此情此景不再。資料圖片


李sir加入警隊超過三十年，約2000年後開始負責公眾活動聯絡工作，十多年間在前線看盡大小遊行集會，至近年才退休。他形容，自己角色類似中間人，過去在警方及示威者之間協調。除了俗稱「收風」，他也要了解示威者情緒，以評估參與人數，有時主辦團體採用較激烈表達，則可能建議改變方式；同時，他說在「好景」的時候，也代主辦團體向警方轉達訴求，爭取路線或示威相關的安排。


例如過去團體到禮賓府示威，由於對出行人路狹窄、外出馬路車多，遊行路線經常安排到後門。李sir說，有時向上頭爭取到禮賓府正門，或派代表到正門示威，「老細可以一句ban左你，但有時派代表上去，大家要傾。」


做呢行，我問心無愧，佢哋訴求我確實係反映咗，得唔得唔係我嘅人決定。軍裝有軍裝嘅考量，我亦都唔過問；如果唔得，就話返給示威者聽。

「好多示威者都尊重我，接觸過、互相尊重，都覺得警民組真係幫到手，所以有段時間警民得到示威者信任。」


可是2019年反修例示威改變這種關係，他形容昔日同袍間氣氛與過去完全不同，「示威者唔同警察傾、溝通，警察都唔願意」。


「其實信唔信人，好多時受雙方行為影響，當警察受示威者傷害，就唔信示威者；同一道理，如果示威者被警察傷害，都唔會信警察，要好多年的時間修復。」


他也直言，尊重2019年示威者訴求，但訴諸暴力的爭取方式有問題，導致警隊高層在非常時期用非常方法，放手給前線警員彈性處理示威現場，避免自己及同袍受傷。但他以2014年佔領中環清場後，有警員向示威者豎起中指、拍手掌，影大合照等，提醒示威者及市民會一直記得這些畫面，累積不滿。


「每個警察著得套制服，都應該專業。等於個一個神父，你叫得自己神父，私生活都要檢點，法官都一樣。宜家市民對警察批評多，除了日常工作，私人生活都係話柄。」


李sir說，昔日七一遊行被批評年年如是，對警隊來說當然和平散場是一件好事，始終警察並不負責政策，真正掌權是政府，可是政府不理回訴求造成部分市民反感，再加上民主派內部分裂。他點起一支煙：「這些就是昨日的因，今日的果；今日的因，明日的果。」


李Sir以六七暴動比喻，情況與今日同出一轍。「世事不斷重複，只是不滿表面化，還是內心化。」


他以六七暴動比喻，情況與今日同出一轍。他點到即止地說：「世事不斷重複，只是不滿表面化，還是內心化。」


在他親身接觸中，近日被親中人士形容顛覆組織、要取締的支聯會一直好合作，還是愛國組織。「仲好尊重警察，每次都叫好多糾察維持秩序，相信不論現職及退休嘅警務人員，大家相信都認同。」


他也憶述，支聯會一直容忍反對六四集會、說六四無死人的團體隔空對陣。「你留意下，支聯會由得佢哋，出面反對就反對，仲叫集會人士唔好同佢嘈，各自表述。你覺唔覺得支聯會係一個激進組織？支聯會係和理非嘛，被激進示威者鬧啦。」



在李Sir親身接觸中，支聯會一直好合作，還是愛國組織。「仲好尊重警察，每次都叫好多糾察維持秩序。」


在警民還有互讓互諒的年代，遊行路線及維持秩序都由警方與主辦單位商討。近年民陣遊行至政府總部的路線，據民陣中人說，就是警方與民陣協商的結果。李sir憶述，政府搬去新政府總部初期，警方對新遊行路線有保留，尤其是遠東金融中心對出旋轉處四通八達，是警方俗稱的「八爪魚位」，接通紅棉道、皇后大道中、干諾道中等，一有示威者靜坐便影響附近主要幹道。


「一轉去新政府總部，（路線上）夏愨道、金鐘道打橫行（入添美道），嘩，傾咗幾耐、搞左幾多次先OK，最初係唔批㗎。好大機會都係民陣傾出來。經過好多次爭取，警方都衡量過風險，先最後開綠燈，最初都唔開。」李sir憶述。


可是他直言，如今「示威者就當係必然」，一旦收緊安排就不習慣。由於在前線與示威者打交道，他說會將不同示威團體，包括民主派的團體等視為朋友，盡可能了解及轉達訴求。「唔可以因為撐政府，我幫佢多啲，佢反對政府嘅，就唔幫佢。」


示威集會係公民權利，佢根據法例入紙通知警方，我們又專業操守佢協助佢哋進行一個和平集會。呢個係我職責，都係我專業。



「最有問題時，當表達不滿使用武力、破壞社會安寧，人身受傷害，就說不過去。香港可愛之處，就係表達不同聲音，百花齊放，只要和平表達，警察係尊重嘅。」


除了食飯及見面溝通，在早年警民關係不那麼繃緊時，他也不時出席一些團體的周年聚會。他也經常在示威現場親身聆聽示威者出席遊行原因。「答案都係千篇一律、都係講粗口啦。政府乜囉，乜係一個粗口。仲有嘢講咩？」


可是示威難免有變數，即使在有大台年代，組織團體都有突發行動。李sir笑言，職工盟表明如果事前完全透露計劃，「我唔使玩啦，我返屋企瞓啦」。2010年反高鐵示威在表決時，最後議員及官員一度被困等，也有示威者走出馬路。「警察有時覺得，跣你啊傻仔。班示威者邊度和平㗎，依家搞到咁，你仲信佢哋，仲幫佢哋講？」


李sir說站在他工作角度，當然並非事事從心所願，示威者有時答應了卻沒有兌現，他職責範圍在不透露警方行動部署下，提醒團體違法等的風險。他說：「我個人比較樂觀，覺得佢哋都係有原因嘅，我職責係同佢哋傾，我哋要專業，唔可以將個人感情影響自己工作。」



李sir說，Figo（陳皓桓）睇住佢大，見佢被人拉，其實佢哋都係人嚟嘅。10幾歲就入社記，不斷同佢講嘢，幾理性，唔係貪威識食嗰啲。


在李sir眼中，示威並非洪水猛獸，示威者都只是人。「孔令瑜一開始好惡，後來好啲。岑子杰，講嘢好理性，好爽直，唔會轉彎抹角。Figo（陳皓桓）睇住佢大，見佢被人拉，其實佢哋都係人嚟嘅。10幾歲就入社記，不斷同佢講嘢，幾理性，唔係貪威識食嗰啲。」


不同意示威者收了錢：如果是為了錢，佢就唔做呢樣嘢喇

他特別提起，不同意藍營有人質疑有人職業示威者。一次他與某組織遊行社工談起，當年大學同班同學已升為政府某局的助理秘書長。李sir慨嘆：「如果是為了錢，佢就唔做呢樣嘢喇，大把政府工做。講到示威者個個為錢，我睇唔到囉！」


「（2006年清拆）皇后碼頭時，朱凱廸窮到啊，連交（call機）台費都無。攞住個爛鬼電話、最平嗰啲，如果佢為咗錢，唔使搞到爛身爛世喇。」


在眾多示威人士中，李sir說他個人最尊重長毛梁國雄，每次言出必行，不會轉個頭就翻臉。「例如上去（禮賓府）正閘，（說明）做咁多就係做咁多，佢唔會話突然做多啲。例如佢會話，要告咪告，六四（集會後）佢堅持要行（去中聯辦），你要拉要鎖，隨便，但我哋要堅持行落去。」


「我在不同渠道知道，佢立法會有人工，做咗咁多屆，聽到佢攞萬零蚊做基本生活，其他放在組織，佢唔掂錢嘅。」


梁國雄在四五行動時期便枱棺材，成為他的標誌之一。李sir證實都市傳說，其實棺材是木皮、空心兼透底。「我們最初都唔知道個棺材係點，唔知棺材裏面有咩，個底係吉，以前唔知。佢哋都好樂意給我們check。」



李sir: 我尊重佢（長毛）有guts，唔會打完退後，然後龜縮，做人要光明磊落。佢仲共產黨過共產黨，佢係真左派嘛！佢好主力係幫工人、草根階層。


呢啲就叫食得鹹魚抵得渴囉，我尊重佢（長毛）有guts，唔會打完退後，然後龜縮，做人要光明磊落。佢仲共產黨過共產黨，佢係真左派嘛！佢好主力係幫工人、草根階層。


說起在因初選案及8.18遊行等案入獄的長毛，他嘆了口氣：「槍打出頭鳥，幾十萬人上街，點解淨係吿知名人士，唔通吿晒幾廿萬人？」以前遊行可能罰錢了事，現在卻判監，常有金句的李sir反問記者：「應該訪問下法官，點解要咁？」


李sir又抽起第二根煙，說：「無辦法啦，2019年是香港的陣痛。陣痛可以有好多個鐘，對香港有幾百年歷史的地方，拉闊一點看，百幾年歷史中的陣痛。無辦法，改了、換了老闆，換了當權者。老闆上任不同，不能用舊的一套衡量以前。」


只是李sir誓神劈願說，自己懶惰的人，公餘或退休後一次都無去過示威遊行，每次出現在示威現場都為公事。


「唯一一次出過來係八九，出過來企咗喺度，但無遊行。係去新華社望下，唔喺新華社、喺大道東個頂度望落去、鄧肇堅醫院度嚟。望落去、八卦囉，當時好多人出來，有歌星獻中華，睇咗陣，我仲記得落好大雨，睇咗陣就走啦，因為自己身分問題，不適宜久留。」


「咁算唔算參與？（路過？）係啊，就係路過！」