馬英九讀古文

CarmenNg

中華民國總統馬英九的母親逝世（見蘋果日報五月三日A27版全版），馬母名秦厚修（1922-2014），1950年在廣華醫院生下馬英九，1952年舉家遷到台北定居。
大記者傳來一篇花邊新聞，講秦女士對馬英九教導有方，自細就督促馬英九讀古文，七歲開始讀，第一篇就係「鄭伯克段于鄢」，大記者問左丁山讀過未？哦，其他古文未必識，呢篇亦都係左丁山讀嘅第一篇古文噃，依家仲記得我地今日有講嘅「多行不義必自斃」、「樂也融融」，聽粵曲有時聽到「不及黃泉無相見」，就係源出於此啦。
先叉開一筆，日前與金融精英M吃午飯，佢依家經常到上海北京與國企主腦談金融交易，慨嘆時時俾啲地方高官與國企頭頭窒親，一講到中國歷史或者古文，就無言以對，口啞啞，覺得吃虧不少，精英M問：「你我都係讀番書英文中學出身，何解你對古文、歷史比我熟咁多？」講講吓，原來乃中學不同之別。精英M讀超級女名校，當年唔教中史嘅，將中史併入世界史，用英文教，好多時略過不提，不少同學選讀法文，不讀中文，身份零舍高過人。左丁山讀嘅係Band5私校（以今日標準睇），校內冇一個港大畢業嘅老師，絕大部份先生係逃港難民，教學資格不受教育司承認，教中文、中史嘅老師尤其對列強侵華及共產黨講到咬牙切齒，罵完又罵。中二時，國文老師大罵殖民地教育下嘅國文課本水皮不堪，要我地買《古文觀止》或《古文評註》上堂，「鄭伯克段于鄢」就係《古文觀止》第一篇，出自《左傳》，想來馬英九母親亦係揸住本《古文觀止》教馬英九啦。我地中二班讀呢篇嘢讀到死死吓，經老師細心講解，先至知道主旨係鄭莊公細佬段恃住阿媽錫佢，欲挑戰阿哥，莊公特登姑息佢，段後來以為自己有勢力，想作反，莊公先至發兵鎮壓之，以為自己有晒藉口，點知史書講此事，就寫「鄭伯克段于鄢」，解云「段不弟，故不言弟；如二君，故曰克；稱鄭伯，譏失教也；謂之鄭志。」（指莊公志在養奸，然後殺之），中二生讀此文，那裏懂得內裏微言大義，入社會做事後，先至知道呢樣嘢係中國政治鬥爭史第一課。

左丁山