華為 連MPEG LA官司都輸得：早抖喇

伺尋喜樂

martinoei 黃世澤
1 天 ago
華為 連MPEG LA官司都輸得：早抖喇
華為 P10-min


華為 同中興上個月喺我住果個城市嘅地方法院，輸咗單專利官司，依家搞到 華為 同中興可能唔可以賣電話喺德國，我睇到係 MPEG LA 嘅H.264嘅官司，呢單官司去到白痴地步，亦反映點解全世界對 華為 同中興咁火滾。

華為 問 MPEG LA買專利嘅錢都想慳
MPEG LA基本上係一間好開放嘅專利代表公司，因為H.264嘅專利，涉及一堆唔同公司個別技術貢獻，逐間公司買專利權好叉煩，所以MPEG LA一炮過代理晒，而MPEG LA收嘅錢一般係好平，你講緊一部機2蚊美金嘅授權費，其實一啲都唔貴，講緊成堆公司，可能收果幾仙，幾毫美金授權費，咁都想慳，呢件事真係啲公司唔火滾就出奇。

但成件事最膠係，其實H.264有一小部分專利係屬於中興，中興都係委托MPEG LA收錢，但中興居然自己唔俾H.264嘅授權費，大佬，呢個世界邊有咁著數㗎，膠就唔會咁俾喇，我睇完覺得成件事膠到無譜，我都未計 華為 ，做得業界大老，好心就磅水俾果啲授權費喇，你話每部機攞你十蚊美金就話要佢死過啫，每部1-2蚊美金，其實真係唔算得上啲乜嘢錢，證明中國人果種縮骨嘅做生意手法，真係啲人唔火滾就有鬼。

其實 華為 同中興如果唔想死得咁快，最簡單方法係俾晒啲專利權費數算數，否則就算你中國可以繼續賣，全歐盟唔准賣你 華為 手機，你間公司仲唔死多兩錢重，而且 華為 同中興如果真係勁到自己有專利，會擺入未來嘅技術標準度，都要用MPEG LA呢啲公司合作，依家搞到咁膠有乜為？好似中興咁，呢次係中興有份告自己，我真係未聽過呢啲可以膠到咁嘅事情，雖然中興嘅專利，都應該去到就嚟過期嘅階段，好可能短期內唔會再有錢收。
無錯，呢個世界有啲版權收數佬，堅係好乞人憎，例如IFPI，CASH香港之類，但MPEG LA其實係做得幾好嘅一間，因為有專利權嘅公司，都係想技術普及，唔志在一炮過收好貴專利費，每部攞你果少少，山大斬埋有柴咁解，喺2010-2015年期間，MPEG LA都有時同業界開片，但依家大致解決，所以IT業界普遍對MPEG LA無投訴，甚至有啲MPEG LA會員自己Open Source咗相當部分H.264技術，例如Cisco，MPEG LA都無點針對Open Source 社群，所以我完全唔明 華為 間公司班友個腦嘅構造。有時 華為 招人圍攻，就係因為連基本規矩都唔守

wu_peace

做人以至做生意，必須堅守誠信老實，
才能活得自在，心安理得 !