20180209郭博士開示:戰雲密報

erict

　　有一句廣東話就是針唔拮到肉唔知痛。當女主角極有可能成為受害者之一，就非常大件事。

　　當你天天跟政要把酒言歡，視對方為好朋友，原來對方曾經毫不猶疑地送你子女上戰場，九成為炮灰。

　　因為你當日遇到丈夫自殺，幾乎不能振作，對方百般關懷，使你信靠對方。但原來對方為三朝元老，由甘迺迪，詹森到尼克遜，都撈得掂，憑的是什麼？似唔似馮道？

　　而當你遇到丈夫自殺之後，再也承受不起再有親人逝去，頃刻發現你的好朋友如此心狠手辣。原來在文件中曾經說過一句打越戰係false cause，頂唔緊，母愛的威力就爆發出來。即係話你明知我個仔上戰場打的是九死一生的戰爭，同親手殺我個仔根本冇分別。

　　要知道華盛頓郵報上市計數，135萬股再乘24元一股，以六七十年代消費指數，3,240萬是天文數字，估計當時香港一幢四五層樓不用十萬，即是可以由太子到尖沙咀的所有樓宇及店舖都掃晒，仲可能掃到兩三條彌敦道。憑咩夠膽賭呢舖？

　　能夠有此勇氣豪賭，因為女主角視親情多於一切，情感行先；第二，眼前的老友政客原來如此無情；第三，有憲法第一條保護言論自由，而美國真係有講有做，可以行使；第四，美國司法算是獨立，起碼有所本，就同你玩一舖。

　　不過，我認為呢套戲是借古嘲今。尼克遜最後下場係因為水門事件拉閘。