天羅地網

標題: 文武廟 [打印本頁]

作者: yinkk 時間: 2015-8-26 10:20
標題: 文武廟
沙田陳太個外孫女，眨吓眼已經有兩歲半，到九月一日返幼兒班，年近三歲咯，於是沙田陳太請左丁山查通勝，為佢揀個吉日吉時，到荷李活道文武廟摸一摸文昌帝君枝筆。
易事啫。好快就同佢搵到吉時吉日，陳太自沙田坐的士經西隧去荷李活道，全不塞車，半小時就到，點知到咗荷李活道，中年司機竟然話唔知文武廟喺邊，轉彎轉錯方向，要兜多一個圈，陳太話當行咗一個大運。
小孩入學之前拜文武廟，乃香港傳統，或者新一代人物唔會知道。左丁山先父入私塾前拜過，到左丁山入義學讀小一，佢又帶左丁山去拜，大學畢業後，更督促左丁山去還神，多謝文昌帝君保佑讀書順風順水。好咯，到左丁山兒女出生，先父已不在，本想慳番此一儀式，點知家姐出聲，話要遵照傳統，兒女入學前到文武廟一拜，咁就唯有照辦，求心安箒。到兒女大學畢業後讀埋碩士，叫佢地去還神，兩人都咦咦哦哦，都唔記得有冇去過咯。
陳太帶住個孫，俾佢一個小背囊孭住，佢話裏面有兩棵葱（聰明也）、計數機（數學也，昔年用算盤仔）、一本中英文字典、一本寓言故事，裝備齊全，於是帶孫女入內祈福，祈求文昌帝君保佑孫女入學順利，中英數良好，讀書聰明。離開前要抱個孫女摸一摸文昌帝君枝筆，辛苦咯，小孩子見到就驚，不肯就範，要抱住佢向上舉高半呎先至摸得到，搞到身水身汗，氣喘連連。
拜完文武廟，唔通就會他日成為文憑試狀元，IB狀元？非也，讀書畢竟要靠自己努力，與拜文昌帝君冇科學性驗證，但今時今日，香港年青人不懂歷史不懂傳統，似水上浮萍，飄浮無根，父母帶佢地去文武廟，講吓家庭傳統，實情係一種通識教育，令小孩長大成人後，記得幼時有呢件事，可以同人講吓一件風俗傳承。香港島已經無甚文物古蹟，只有荷李活道文武廟有百幾年歷史，有街坊口述歷史，有香港不同家族之集體回憶（例如左丁山），至今香火鼎盛，係好值得向小孩子傳授嘅。陳太話佢到文武廟時，有好多外國遊客入內拍照，可惜佢地完全唔識拜文武廟之意義，拍張東方古老神廟相就離開，如果廟內有英文小冊子簡介關公與文昌帝君，派俾遊客，就更加吸引遊客！

左丁山

作者: bcyeung 時間: 2015-8-26 12:31
thx for sharing

歡迎光臨天羅地網 (http://139.162.60.118/)