復活節假期只有一日賽馬，左丁山樂得清靜，有時間清理家中積存嘅大堆舊剪報，與細心閱讀一啲平時只會匆匆瀏覽嘅趣聞。復活節大新聞就係來港多年，唔需要奉調回國嘅華潤集團董事長宋林，呢位先生外貌英俊，今年只得五十一歲，四十五歲就已經坐正，在國企嚟講，可說講得係少年得志，權傾一時，咁咯喎，依照國內潛台詞，肯定係有美女圍在身邊打轉，家庭婚姻若有若無之類，亦應該係有後台照住嘅啦。華潤係在港經營嘅最老牌國企，幾十年前已在香港發揮影響力，控制內地輸港糧油食品，隸屬國務院對外經濟貿易部（現已改組成商務部），由陳慕華、吳儀長期把持，能夠在華潤集團做到董事長嘅，個人實力與「貴人」關照，缺一不可。
叻仔如宋林事先都矇查查，遭新華社記者王志文在四月十五日具名檢舉，仍然在四月十六日凌晨發表聲明否認，表示憤慨，但在四月十七日就俾中紀委從深圳帶走調查，到當日（星期四）晚上八點幾鐘，中紀委網站就公佈宋林涉嫌嚴重違紀，接受調查。從時序可知，宋林以為有後台可依，到最後時刻，仍然硬䇛，殊不知已陷入無助無力狀況了。
宋林即使有事，不值得我地驚訝，反正此類人太多，已見怪不怪了。四月十九日星期六，睇金融時報訪問哥倫比亞大學教授Jagdish Bhagwati（Professor of Economics, Law, and International Affairs），呢位大名鼎鼎嘅經濟學家被問及印度與中國之競爭，B教授有個發人深省嘅見解，佢話中印之最重要分別，係在貪污形式方面，印度人貪污係經典式尋租（classic rent-seeking），即在現行制度下互相勾結攞着數，中國式貪污係將一條飲管插入一杯奶昔，大家輪流飲，「大家」（即官員、國企、領導人）為自己利益計，有意願及興趣將杯奶昔搞大啲，每人可以飲多一啖吖嗎！宋林、蔣潔敏等人，可能就係在前台負責搞大杯奶昔，等後台可以飲一大啖嘅！
