標題: 法國式工作 [打印本頁] 作者: CarmenNg 時間: 2014-4-19 11:54 標題: 法國式工作 本欄在四月十日講「法國追求增長」，一位讀者Wong來電郵，附上英國「衞報」一篇報道（四月九日），題目係"When the French clock off at6pm, they really mean it"，讀者Wong話內容與左丁山嘅論調有矛盾喎。「衞報」（據英國通陶傑所言）係英國「左派」報紙，屬於反市場，要求福利一類，贊成法國縮短工時，一啲都唔奇。據呢篇「衞報」報導，法國自1999年訂下每週工作三十五小時法案之後，因電子科技不斷發展，智能手機、電郵等進一步入侵私人生活空間，不少法國僱員放工返家後，仲會收到公司電郵文件或被要求上網睇公司客戶情況，在家吃過晚飯，還是要工作，於是法國工會與僱主聯合談判達成協議，法國工人放工後，不得受「威脅」，冇義務要閱讀、收集與工作有關嘅文件、訊息。IT界與顧問服務界每每最多呢啲「晚飯後午夜工作」，但上述有法律效力嘅協議落實後，所有IT界、顧問界嘅二十五萬僱員亦都受到保護。
