天羅地網

標題: 處理幼園風波吳得掂一鑊粥 [打印本頁]

作者: CarmenNg 時間: 2014-4-11 17:42
標題: 處理幼園風波吳得掂一鑊粥
本帖最後由 CarmenNg 於 2014-4-11 17:43 編輯

天水圍德怡中英文幼稚園因被同區嘅英藝幼稚園暨國際幼稚園，以高價奪去校舍租約而被迫遷，搞到幾百個小朋友突然要轉校，外號「吳得掂」嘅教育局局長吳克儉，應承喺今日同身兼元朗區議員嘅立法會議員梁志祥、關注事件嘅區議員、德怡教師同家長會面商討有關事宜，但點知吳得掂尋日突然話今日冇時間，要改到下星期見喎。究竟有咩事重要得過處理小孩教育問題呢？

據聞，對於吳得掂嘅態度，有兩種講法，第一就係佢認為事件係商業糾紛，政府不宜介入；另一個講法，就要由立會議員陳家洛同梁志祥現身說法嘞。梁志祥話吳得掂同佢講，「英藝已經收咗百幾位原於德怡讀書嘅學生」喎。梁志祥覺得政府似乎偏幫咗英藝，認為政府應該中立啲去處理事件。

「啲家長執到啦」陳家洛就話吳得掂同佢講，「啲家長執到啦！英藝好過德怡咁多，又係名校！」似乎政府覺得當區有足夠幼稚園學位，所以不宜介入事件。不過，陳家洛就認為吳得掂嘅做法非常唔啱，因為今次屬於嚴重搶地事件，政府唔應該懶懶閒。雖然唔知邊一位講嘅先至係真，但無可厚非嘅係身為教育局局長，凡涉及學童教育嘅事，都應該盡快處理囉！

不得不提嘅係當局尋日畀立會教育事務委員會、就建議成立小組委員會研究免費幼稚園教育嘅回覆。教育局話明白社會各界都期望盡快落實免費幼稚園教育，但認為立會成立小組委員會前，應考慮小組委員會嘅職權，以及工作可能會同政府具廣泛代表性嘅「免費幼稚園教育委員會」重疊，同埋局方人手緊絀，所以可能咁樣做會拖慢政府委員會嘅工作進度喎。

講嚟講去，咪就係唔想立會搞多樣嘢出嚟囉，之但係學前教育搞到一鑊粥都係多得吳得掂，而教育局咁嘅回覆，吳得掂係咪想改名做「唔想做」？

歡迎光臨天羅地網 (http://139.162.60.118/)