天羅地網

標題: 舊樓維修惹貪腐可憐業主任魚肉 [打印本頁]

作者: CarmenNg 時間: 2014-3-11 18:43
標題: 舊樓維修惹貪腐可憐業主任魚肉

今時今日，香港生活真係好艱難，好似房屋呢個「老大難」問題咁吖，無殼蝸牛固然望樓興嘆，有樓一族一樣咁閉翳。嗱，一群業主計劃上街抗議樓宇維修工程圍標猖獗，黑幕重重，小業主任人宰割。

由九個屋苑業主組成嘅「全港反貪腐反圍標大聯盟」，尋日出嚟吐苦水。佢哋話喎，政府實施強制驗樓後，工程圍標問題愈來愈嚴重，工程顧問公司、承建商、物業管理公司，甚至業主立案法團，形成一條龍式圍標集團，將維修費大幅抬高至市價嘅一至兩倍。有供緊樓嘅業主投訴，其物業維修費高達三十萬元，根本無力負擔，質問政府點解完全冇監冇管。

即係咁，年紀大，機器壞，現時全港落成逾三十年嘅高齡舊樓約有兩萬幢，當局預計每年最少有超過五百幢舊樓需要大維修，涉及利益數以十億元計。咁大舊肥豬肉放喺面前，點會唔惹起不法分子垂涎吖。有業內人士爆料話，家陣嘅圍標集團運作手法非常純熟，顧問公司同承建商之間好有默契，就算業主向廉署舉報，往往因為證據不足而難以入罪，有冤無路訴。

講真，經過一連串「飛窗」、塌樓事件後，當局為咗保障市民安全，推行強制驗樓措施，本來係好事，問題係當局推出政策後就闊佬懶理，放任自流，唔出事至奇喇。正如有立法會議員話齋，現行嘅《建築物管理條例》門檻太低，只要獲得全幢大廈百分之五嘅業權份數支持，就可以通過維修方案，而且有權揀選承建商。少數代表多數嘅結果，容乜易出現黑箱作業，中飽私囊，貪污腐敗。

呢，早前沙田某屋苑業主因不滿大廈維修費過高，激到喺獅子山隧道對出天橋企跳，可想而知圍標問題幾咁嚴重，不法集團幾咁飛擒大咬，小業主幾咁走投無路。當局話就話高度關注，仲話已聯同三大專業學會推出「顧問易」計劃，向業主提供免費諮詢，可惜呢啲都係表面工夫，治標唔治本。講到底，當局應該先修訂物業管理條例，有人建議由目前百分之五嘅業權支持份數，大幅提高至百分之五十，加上警方及廉署主動出擊，咁先至可以起到阻嚇作用。

冇錯嘞，治亂世，用重典，否則香港只會愈來愈烏煙瘴氣嘅咋。咪話太一叮唔提醒，貪腐就好似傳染病咁，自從貪曾同貪湯呢對「絕代雙貪」遺禍香江，廉潔指數已經拾級而下，法治招牌岌岌可危，當局再唔斬妖除魔，全力反腐，香港好快就會變成同內地一樣嘅嘞，叮！

歡迎光臨天羅地網 (http://139.162.60.118/)